Azərbaycanlı milli-mədəni fəal Həsən Ərk bir gün saxlandıqdan sonra ağır mülki vəsiqə qarşılığında sərbəst buraxılıb.
Müvəqqəti azadlığa buraxılan fəal saxlandığı günü Təbrizin polis idarəsinin təhlükəsizlik bölümünün təcridxanasında keçirib.
Qeyd edək ki, bir neçə gün öncə azərbaycanlı milli-mədəni fəal Həsən Ərk qızı Solmazla birlikdə təhlükəsizlik qüvvələri tərəfindən tutuqlanıb.
Sentyabrın 11-də (şəhrivərin 20-də) Polis idarəsinin təhlükəsizlik qüvvələri Təbrizdə Həsən Ərkin evinə müraciət edib və onu qızı ilə birlikdə yaxalayıblar. Məmurlar evdə axtarış aparıb və azərbaycanlı fəala aid notebook, compüter keysi, kitablar, əlyazmalar və s. kimi bir sıra şəxsi əşyaları özləri ilə aparıblar. Solmaz Ərk bir neçə saat saxlandıqdan sonra zəmanətə buraxılıb.
Xatırladaq ki, Həsən Ərk 2011-ci il avqustun 24-də (1390-cı il şəhrivərin 2-də) daha 28 fəalla birlikdə Təbrizin Qumtəpə məhəlləsində Urmu gölü böhranının çıxış yollarını müzakirə edərkən tutuqlanan fəallardan biridir. O mədəni zəmindəki fəaliyyətlərinə görə bundan öncə də dəfələrlə tutuqlanıb, həbs edilib və müxtəlif təzyiqlərə məruz qalıb.

BAO.az