İsrail ordusunun Qəzza zolağının müxtəlif bölgələrinə hücumları nəticəsində 16 fələstinli həyatını itirib.

Xalqcebhesi.az xəbər verir ki, bu haqda Türkiyənin “sozcu.com.tr” saytı məlumat paylaşıb.

Məlumatda deyilir ki, İsrail ordusunun Beyt Lahiyaya artilleriya hücumları nəticəsində 11 nəfər ölüb, çox sayda insan isə yaralanıb.

Xan Yunusda isə İsrailin hava hücumu nəticəsində Mavasi qaçqın düşərgəsində güclü partlayış baş verib. Bildirək ki, İsrail, Mavasi düşərgəsinin "təhlükəsiz bölgə" olduğunu bildirmişdi. Partlayışda yaranan toz buludu metrlərlə uzaqdan görünüb.

Hücumlarda ölən və yaralanan fələstinlilər Qəzzanın şimalındakı Kemal Advan xəstəxanasına aparılıb.

İsrail ordusu Qəzza şəhərinin Şucaiyye bölgəsinə hava zərbəsi endirib, 2 nəfər həyatını itirib.

Qəzza zolağının mərkəzi bölgəsindəki Nusayrat Qaçqınlar füşərgəsinə pilotsuz uçuş aparatı (PUA) ilə edilən hücumda 2 nəfər, cənubdakı Rəfah şəhərinə PUA hücumunda isə 1 nəfər ölüb.