ABŞ-ın “Wall Street Journal” qəzetinin yazdığına görə, Donald Trampın komandası İranın nüvə proqramını ləğv etmək üçün hərbi əməliyyat təhlükəsi və iqtisadi sanksiyaları birləşdirən “maksimum təzyiq 2.0” strategiyasını nəzərdən keçirir.

Xalqcəbhəsi.az xəbər verir ki, məlumatda Trampın ilk prezidentlik dövründə hərbi güc tətbiq etməkdən qaçdığı, lakin İsrailin Hizbullaha böyük itkiləri və Bəşər Əsədin devrilməsi kimi tarazlığı dəyişən hadisələrdən sonra bu mövqeyini dəyişdirə biləcəyi qeyd edilib. Qəzet ABŞ-nin bölgəyə daha çox hərbi qüvvə, gəmi və döyüş təyyarələri yerləşdirmək və İsrailə bunker dağıdan bombalar satmaq kimi addımlar ata biləcəyini yazıb.

Bildirilib ki, bu addımlar uğursuz olarsa, birbaşa hərbi güc təhdidi gündəmə gələ bilər, lakin strategiya hələ dəqiqləşdirilməyib. Həmçinin qeyd olunub ki, Tramp vəzifəyə gəldikdən sonra bu planlar dəyişə bilər.
İsrail mediası Tel-Əvivin İranın nüvə obyektlərinə hücuma hazırlaşdığını iddia edib.
İsrail İranın nüvə proqramını birbaşa özü üçün təhlükə kimi görür və bu məsələdə ABŞ ilə sıx əməkdaşlıqda hərəkət etməyi hədəfləyir.