“Suriyanın şimalında, yəni Türkiyənin cənub sərhədlərinə yaxın ərazidə PKK və YPG Türkiyə üçün daim çox ciddi təhlükəsizlik problemləri yaradıb və Türkiyə də həm İraq ərazisində, həm Suriyanın şimalında PKK və onun Suriya qolu olan YPG-yə qarşı aktiv mübarizə aparıb. Son olaraq da 30-dan çox terrorçu zərərsizləşdirilib. Burada diqqəti çəkən əsas məsələ ondan ibarətdir ki, Türkiyənin yeni Suriya hakimiyyəti ilə sıx dialoqu mövuddur. Türkiyənin Suriyadakı yeni hakimiyyət üzərində təsirləri də müşahidə olunmaqdadır. Bu isə o deməkdir ki, Suriyada yeni hakimiyyət PKK və YPG ilə hər hansı bir güzəşt məsələsini müzakirə etməyəcək. Bu, görünən məsələdir. Həmçinin Suriyanın şimalında PKK və YPG-ni ABŞ koordinasiya edirdi. Hətta şimal ərazilərindəki neft yataqlarına da terrorçu qruplaşma ABŞ ilə birlikdə nəzarəti həyata keçirirdi”.

Bu sözləri xalqcəbhəsi.az-a açıqlamasında politoloq Elşad Mirbəşiroğlu söyləyib.

E.Mirbəşiroğlu əlavə edib ki, görünür ki, yenə də əvvəlki status-kvo vəziyyətinin saxlanılması ABŞ-dən gələn təlimat əsasında baş tutmaqdadır: “Şübhəsiz ki, ABŞ-nin PKK və YPG ilə əlaqələri qalmaqdadır və belə olan halda yenə də ABŞ PKK və YPG-yə Suriya ərazisində özünün istinad nöqtələrindən biri kimi baxır. Suriya ordusunda da PKK-nın korpusa sahib olma istəyi də hesab edirəm ki, təsadüfi deyil. Yəni bununla bu terrorçu dəstə özünün hərbi mövcudluğunu qoruyub saxlamaq istəyir”.

Politoloq hazırkı reallıqlar çərçivəsində buna imkan verilməyəcəyini, Türkiyə ərazisində PKK və YPG-nin fəaliyyəti üçün şərait olmayacağını vurğulayıb: “Suriyanın yeni hakimiyyətin PKK-nın irəli sürdüyü şərtləri müzakirə etməməsi, qeyd-şərtsiz silahları yerə qoyması və liderlərinin də ölkəni tərk etməsi tələbi bir daha bunu sübut edir. Ayrıca olaraq da Türkiyə də bu məsələni öz nəzarətində saxlayır. Ona görə də Türkiyənin cənub sərhədlərində həqiqətən də terror təhlükəsi aradan qalmış olacaq. Düşünürəm ki, Türkiyə Prezidenti Rəcəb Tayyib Ərdoğan da məhz buna işarə edərək bildirmişdi ki, terror məsələsi Türkiyə üçün bağlanacaq”.

Röya İsrafilova