“İsrail Hərbi Hava Qüvvələrinə məxsus döyüş təyyarələri Suriya paytaxtının şimalındakı Masakin Berzi bölgəsində yerləşən hərbi obyektə raket zərbəsi endirib. Bu barədə Suriya telekanalı məlumat yayıb. Bildirilib ki, hava hücumundan sonra Dəməşq və onun ətrafında güclü partlayış olub. Hava hücumuna məruz qalan obyekt Suriyanın keçmiş ordusuna məxsusdur. İsrailin Suriyada əməliyyatlar həyata keçirməsində 3 əsas məqsəd var. Birincisi Türkiyənin bu ölkədə güclənməsi ilə bağlıdır. İsrail iddia edir ki, Türkiyə Palmira şəhəri yaxınlığındakı T4 aerodromuna nəzarəti ələ keçirmək niyyətindədir".

Bunu xalqcəbhəsi.az-a politoloq Zeynal Əmirəliyev deyib.

Politoloq bildirib ki, Türkiyə uzun müddətdir ki, bu baza ətrafında möhkəmlənir: “Rəsmi Ankaranın bu ərazidə hava hücumundan müdafiə sistemləri yerləşdirilməsi İsrailin Suriyada tətbiq etdiyi əməliyyat sisteminə mane olur. Rəsmi Təl-Əviv vəziyyətin bu şəkildə dəyişməsindən məmnun deyil və Türkiyənin geri addım atması, Suriyada daha da möhkəmlənməsinin qarşısını almağa çalışır. İkinci bir məqam isə Suriyadakı Əhməd əl-Şara hökuməti ilə bağlıdır. Aydın məsələdir ki, İsrail hər nə qədər Bəşər Əsədin hakimiyyətdən devrilməsini arzuladısa keçmiş cihadçı əl-Şaranın hakimiyyətə gəlməsindən də məmnun deyil. Hələ Əsədin devrildiyi ilk günlərdə İsrail uzun illərdir əlində saxladığı Colan təpəliklərinin ətrafındakı mühüm su mənbələrini elə keçirərək bundan yeni hökumətə qarşı təzyiq vasitəsi kimi istifadə etmək, həm də ərazidə yerləşən hərbi qüvvələrinin təhlükəsizliyini təmin etməyi hədəfləyirdi”.

Z.Əmirəliyev əlavə edib ki, Yəhudi dövləti bununla bərabər, eyni zamanda, yeni hökumətə və Türkiyəyə qarşı kürd və druz qruplarını dəstəkləyirdi: “Ancaq əl-Şara hökuməti bu qruplarla məsələni sülh yolu ilə həll etməyə nail oldu. Bununla belə, rəsmi Təl-Əviv Türkiyənin Suriyada güclənməsini qəbul etmək istəmir. İsrailin müdafiə naziri Yisrael Kats məsələ ilə bağlı olduqca kəskin açıqlama verib. Nazir bildirib ki, İsrailin təhlükəsizliyini təhdid edən qüvvələrin Suriyaya yerləşdirilməsinə heç bir halda dözülməyəcək. Kats konkret olaraq Suriya Prezidenti Əbu Məhəmməd əl-Colaniyə – Əhməd əL-Şara səslənərək belə deyib: “Colaniyə xəbərdarlıq edirəm: əgər düşmən qüvvələrin Suriyaya daxil olmasına və İsrailin təhlükəsizlik maraqlarını təhdid etməsinə icazə versəniz, çox ağır bir bədəl ödəyəcəksiniz”. Bu onu göstərir ki, İsrail Suriyanın müvvəqəti hökumətinə təzyiq siyasətini davam etdirəcək. Təl-Əvivin sərt addımlar atmasının başqa bir səbəbi isə Donald Trampın Suriyada İsrailin deyil, daha çox Türkiyənin mövqelərini müdafiə etməsidir. Hələ Tramp and içməmişdən əvvəl Suriyada Türkiyə ilə birlikdə hərəkət edəcəklərini bildirmişdi. Buna görə də İsrail həm də ABŞ-yə göstərmək istəyir ki, o, olmadan Suriyada qalıcı sülh mümkün deyil”.